តៃវ៉ាន់ ប្រកាសពង្រឹងល្បឿនសឹកជាបន្ទាន់ ក្រោយសញ្ញាព្រមានមុនចិនវាយប្រហារខិតទៅកាន់តែខើច

ទីក្រុងតៃប៉ិ៖ លោក Wellington Koo រដ្ឋមន្ត្រីក្រសួងការពារជាតិតៃវ៉ាន់ បានប្រកាសអាសន្នថា កងទ័ពតៃវ៉ាន់ចាំបាច់ត្រូវតែសាកល្បងសមត្ថភាពឆ្លើយតបភ្លាមៗ ក្នុងករណីមានសង្រ្គាមផ្ទុះឡើង ព្រោះពេលនេះសញ្ញាព្រមានមុនពេលចិនបើកការវាយប្រហារ គឺកាន់តែខើចទៅៗហើយ។

យោងតាមការផ្សាយរបស់ទីភ្នាក់ងារសារព័ត៌មានរ៉យទ័រ (Reuters) ការប្រកាសនេះបានធ្វើឡើងស្របពេលដែលតៃវ៉ាន់កំពុងរៀបចំសមយុទ្ធយោធារយៈពេល ៥ថ្ងៃពេញ ដើម្បីពង្រឹង «ការត្រៀមខ្លួនប្រយុទ្ធភ្លាមៗ»។ ក្នុងនោះ កងទ័ពតៃវ៉ាន់ បានចាប់ផ្តើមហ្វឹកហាត់លើសេណារីយ៉ូមួយ ដែលថា ចិនអាចនឹងផ្លាស់ប្តូរការធ្វើសមយុទ្ធធម្មតារបស់ខ្លួននៅជុំវិញកោះតៃវ៉ាន់ ទៅជាការវាយប្រហារពិតប្រាកដតែម្តង។

កងទ័ពតៃវ៉ាន់កំពុងរៀបចំសមយុទ្ធយោធាដើម្បីពង្រឹងការត្រៀមខ្លួនប្រយុទ្ធភ្លាមៗ

លោក Koo បានបញ្ជាក់ថា សមយុទ្ធលើកនេះគឺផ្តោតសំខាន់បំផុតទៅលើល្បឿន ពោលគឺធ្វើការផ្លាស់ប្តូរស្ថានភាពពី «ពេលសន្តិភាព» ទៅជា «ពេលសង្រ្គាម» ឱ្យបានលឿនបំផុតតាមដែលអាចធ្វើទៅបាន ដើម្បីទប់ទល់នឹងការគំរាមកំហែងនាពេលបច្ចុប្បន្ន។

ការឆ្លើយតបពីទីក្រុងប៉េកាំង៖ អ្នកស្រី Zhang Han អ្នកនាំពាក្យការិយាល័យកិច្ចការតៃវ៉ាន់របស់ចិន បានចេញមុខស្តីបន្ទោសថា ការធ្វើសមយុទ្ធរបស់តៃវ៉ាន់ បង្ហាញពី «បំណងអាក្រក់ ក្នុងការស្វែងរកឯករាជ្យដោយប្រើកម្លាំងបាយ»។ អ្នកស្រីបានព្រមានធ្ងន់ៗថា សកម្មភាពរបស់អាជ្ញាធរតៃវ៉ាន់ គឺគ្មានប្រយោជន៍ឡើយ មានតែនាំមកនូវការបំផ្លិចបំផ្លាញ ទោះជាយ៉ាងណាក៏ដោយ ចិននៅតែប្រាថ្នាចង់បង្រួបបង្រួមជាតិដោយសន្តិវិធី ប៉ុន្តែដាច់ខាតមិនព្រមបោះបង់ជម្រើសប្រើប្រាស់កម្លាំងយោធានោះទេ។

កងទ័ពតៃវ៉ាន់កំពុងរៀបចំសមយុទ្ធយោធាដើម្បីពង្រឹងការត្រៀមខ្លួនប្រយុទ្ធភ្លាមៗ

បច្ចុប្បន្ន ប្រធានាធិបតីតៃវ៉ាន់ លោក ឡៃ ឈីងតេ (Lai Ching-te) កំពុងតែដឹកនាំយុទ្ធនាការធ្វើទំនើបកម្មកងទ័ពយ៉ាងសកម្ម ដោយមានគោលដៅជំរុញកញ្ចប់ថវិកាការពារជាតិឱ្យកើនឡើងដល់ ៥% នៃផលិតផលក្នុងស្រុកសរុប (GDP) មុនឆ្នាំ២០៣០។ លោកបានដាស់តឿនមេទ័ពធំៗទាំងអស់ឱ្យមានគំនិតច្នៃប្រឌិតថ្មីៗ ក្នុងការផ្លាស់ប្តូរកម្លាំងទ័ព ព្រោះតែស្ថានភាពប្រឈមនាពេលនេះមានភាពស្មុគស្មាញខ្លាំង និងមិនមែនជាទម្រង់សង្រ្គាមបែបបុរាណទៀតឡើយ។

ផែនការបង្កើនថវិកាយោធារបស់តៃវ៉ាន់នេះ ទទួលបានការគាំទ្រយ៉ាងពេញទំហឹងពីសហរដ្ឋអាមេរិក។ លោក Raymond Greene មន្ត្រីការទូតជាន់ខ្ពស់របស់អាមេរិកប្រចាំនៅទីក្រុងតៃប៉ិ បានបញ្ជាក់ថា អាមេរិក និងសម្ព័ន្ធមិត្តក្នុងតំបន់ មានទស្សនៈដូចគ្នា គឺត្រូវតែរួមគ្នាការពារ និងទប់ស្កាត់រាល់ការប៉ុនប៉ងយកកោះតៃវ៉ាន់ដោយប្រើកម្លាំងបាយ ដើម្បីរក្សាស្ថានភាពដើមនៅតំបន់ខ្សែសង្វាក់កោះទីមួយ (First Island Chain)។